Moongfali Waala

Baitha sadak kinaare, kisi gali,
Koi deewar ki aadh liye.
Baitha un chatakhti ediyon, par bal dekar.
Kisi grahak ki aas liye.

Muskura uthta tha, jab kapde chadh jaate the logo ke.
Ek ummedd banke aati thi thandi hawayein mere liye.
Daane bechkar, daana paani ka intezaam karna hai.
Daane bechne waala hun, bas yahi kaam karna hai.

Lohe se loha takrae, aur jab chan chan rait chanti jae.
Ek mahak aisi aaye, jo jebon se, haath hatae.
Do pal ki baatein ho, ya badi si gupshup.
Chit- pat, chit- pat…karte karte.
Samay chala jaata jhatpat.

Har insaan se waakif hun,
Har harkat ka gawaah hun.
Sadak ka bandaa hun.
Par hawa ke maafik hun.

Koi paanch rupalli deta hai, koi dus to koi do.
Koi muft ki rebri maangta hai.
Aur koi kehta hai "bhai loot rahe ho"
Par ye daane, har khushi har gham ke saathi hain.
Paas hi ki tooti bench ne suni…
Naa jaane kitnee kahaani hain.

Shaam hui to, log ghate.
Aur chilke, kaagaz ki kheti khile.
Aur jhadoo lagaakar Ram Singh bola.
Bhaiyya aaj to bade kamaa liye.

Kitno ne suni kahaani humse.
Kitno ne kahi kahaani.
Aur saalo se yahaan baitha hoon…
Dekh sun chukka kai kahaani maje ki.
Log jaante hain, kuch pehchaante hain.
Aur kuch udhaari ke bhi hain…
Jo sirf dukh baantte hain.

Beete din aur beete saal.
Badal gai logo ki chaal.
Akhbaar ki pudiya haathon mein..
Ban gayi sharam ki misaal.
Ab cola hai, aur packet hai.
Ya fir coffee aur biscuit hai.
Shayaad mein puraana ho chala hu.
Ab coat nahi, Bante jacket hein.

Koi andhere mein se aata hai,
Chupchaap ek packet le jaata hai.
Aur koi galti se din mein le gaya.
Wo badi jeb mein use chupata hai.

Pata nahi mein purana hoon,
Ya log ho chuke kaafi naye.
Sharam kya mera kaam hai,
Ya ye daane logo ke liye.

Par jaisa maine bola tha.
Ki mein sab dekh raha hoon.
Ye bhi ek badlaav hai.
Jise bas khusi se nahi, ghum se samajh raha hoon.

Ab choti dukaan ke Chote pakwaan hain.
Jo dekh ke bhaa gaya, wahi alisaan hai.